a presentation of Dreams & Ideas

         
     
   

विनय कुमार कसजुका कथा

हाँसको चल्ला

एउटा कुखुरा गोठमाथि डालोमा चल्ला कोरल्न बसेकी थिई । ऊ फुलहरूलाई दिनभरि छोपेर न्यानो पारेर बस्थी । भोकलाग्दा कहिलेकाहीँ गोठ नजिकै मलखाल्टोमा पुग्थी र नंग्राले खोस्रेर किरा निकालेर खान्थी ।

एक दिन कुखरा चारो खोज्न गएको बेलामा कान्छाले एउटा फुल सुटुक्क झिक्यो र पकाएर खायो । फुल चोरेको कुरा आमाले थाहा पाउलिन् भनेर उसले साथीसँग एउटा फुल माग्यो र कुखुराको डालोमा राखिदियो ।

बीसबाइस दिनपछि फुलबाट चल्लाहरू निस्के । चींचीं कराइरहेका चल्लाहरूलाई अघिपछि लाउँदै कुखुरा गोठबाट बाहिर आई । कुखुराका चल्लालाई देखेर आमा खुशी भइन् । उनले चल्ला गनिन् । बीस वटा रहेछन् । तर एउटा चल्ला भने कुखराको चल्लाजस्तो थिएन । गिद्धजस्तो लागेर उनले भनिन्, "होइन यो गिद्धको चल्ला हो कि के हो ? यस्को ठोँड त बेग्लै छ ए । कसरी एउटा चल्ला बेग्लै भयो ?"

कान्छाकी आमाको कुरा सुनेर कान्छाको बाले त्यो चल्लालाई हातमा लिएर हेर्दै भने, "होइन यो त हाँसको चल्लाजस्तो छ । हेर् त यसका खुट्टाका पाइला । हाँसको जस्तो छ ।"

कान्छाले बाआमाका कुरा डराईडराई सुनिरहेको थियो, किनकि उसलाई किन एउटा चल्ला बेग्लै निस्क्यो भन्ने कुरा थाहा थियो । तर उसले केही भनेन ।

हाँसकै चल्ला भए पनि कुखुराले त्यसलाई अरू चल्लालाई जत्तिकै माया गरेर हुर्काउन थालिन् । चारो ख्वाउँदा उसलाई पनि नजिकै डाकेर ख्वाउँथिन् । तर उसको ठोँड च्याप्टो भएको हुनाले उसले अरू चल्लाले झैँ कनिका र किरा फटाफट भुइँबाट टिपेर खान सक्तैनथ्यो । यसैले कुखुराले उसलाई अलि बढी हेरबिचार गर्नुपर्थ्यो ।

पानी भरिएको भाँडा, खाल्टो वा पोखरी देख्यो कि हाँसको चल्ला त्यतातिर जान खोज्थ्यो । तर कुखुराले अरू चल्लालाई झैँ उसलाई पनि पानीमा जाला भनेर निक्कै होस पुर्याउँथी । तैपनि ऊ मौका पाउने बित्तिकै कुखुराको आँखा छलेर पानीमा पस्न खोज्थ्यो । हिलो भेट्टायो कि ठोँड घुसारेर टररर गर्दै चारो खाइहाल्थ्यो । हाँसको चल्लालाई यसरी खान पाए मात्रै खाएजस्तो हुन्थ्यो । तर यसरी खाएको कुखुराले रुचाउन्नथी र उसलाई गाली गर्थी ।

हाँसको चल्लालाई अरू चल्लाहरूले पनि जिस्क्याउँथे । कहिले उसको खुट्टाका पाइतला त कहिले ठोँडलाई देखाएर तिनीहरूले गिल्ला गर्थे । उसको स्वर पनि अरू चल्लाहरूको भन्दा बेग्लै थियो । यसले गर्दा ऊ चल्लाहरूको माझमा बसेर पनि आफूलाई एक्लो ठान्थ्यो । कहिलेकाहीँ सबैलाई छाडेर जाउँ कि जस्तो उसलाई लाग्थ्यो ।

एक दिन ठूलो पानी पर्यो । पानी परेको बेलामा कुखुराले चल्लाहरूलाई गोठबाहिर जान रोकिन् । गोठबाहिर खाल्टाखुल्टीहरू वर्षाको पानीले भरिए । पानीका खाल्टाहरू देखेर हाँसको चल्लालाई बाहिर जान र पानीमा खेल्न मन लाग्यो । त्यही बेला उसले केही पर एउटा हाँस एक बथान चल्लाहरूसँग पानीमा रुझ्दै कतै जान लागेको देख्यो । उसले मन थाम्नसकेन । कुखुराले बाहिर नजाऊ भनेर ठूलो स्वरले कराउँदा कराउँदै पनि अटेर गरेर ऊ गोठबाट बाहिर निस्क्यो ।

हाँसको चल्ला पानीमा रुझदै हाँसको बथान भएतिर गयो । हाँस र उसका चल्लाहरू नजिकैको पोखरीतिर जान लागेका थिए । ऊ पनि ती हाँसको पछिपछि लाग्यो । हाँसको बथान पोखरीमा पुगेर पानीमा पौडी खेल्न थालेको देखेर उसलाई रमाइलो लाग्यो । ऊ पनि पोखरीको डिलमा गयो र पानीभित्र हेर्यो ।

पानीमा आफ्नो सक्कली रुप देख्दा ऊ दंग पर्यो । ऊ त पोखरीमा पौडिरहेका अरू हाँसका चल्लाहरूजस्तै रहेछ । ऊ खुशीले चिच्यायो । ऊ चिच्याएको सुनेर बथानका हाँसका चल्लाहरू पनि जोडले कराए । ऊ छक्क पर्यो किनकि उसको स्वर पनि ती हाँसका चल्लाहरूसँग ठयाक्कै मिल्ने रहेछ ।

आफू पनि हाँस रहेछु भन्ने पूरा विश्वास भएपछि त्यो हाँसको चल्ला पानीमा पस्यो । उसले आफूलाई बडो हलुंगो महसुस गर्यो । उसले खुट्टा चलाउँदा ऊ सररर पानीमा अगाडि बढ्यो । यति सजिलोसित पानीमा यताउति जानसकिने थाहा पाएर ऊ खुशीले नाच्न थाल्यो । पानीभित्र माछा देखेर उसले डुबुल्की मार्यो र एउटा सानो माछा समातेर खायो ।

यतिञ्जेल उसलाई लिन भनेर कुखुरा पनि त्यहाँ पुगिसकेकी थिई । उसले परैबाट चल्ला पानीमा नाचिरहेको देखी । पहिले त ऊ चल्ला पानीमा डुबेर मर्ला भनेर आत्तिई । तर ऊ हाँसजस्तै पानीमा निर्धक्कसँग नाच्न, खेल्न र माछा समातेर खान थालेको देखेर उसलाई त्यो कुखुराको चल्ला होइन रहेछ, हाँसको चल्ला रहेछ भन्ने विश्वास भयो ।

हाँसको चल्ला पोखरीको माझमा पुगेर हाँसको बथानका चल्लाहरूसँग मिलेर पानीमा खेल्न थाल्यो । उसले पनि अरू चल्लाले झैँ पानीमा डुबुल्की मार्दै पानीभित्रका माछा, भ्यागुता र किरा खोज्न थाल्यो । यो देखेर अब हाँसको चल्ला बाँच्ने भयो भनेर कुखुरा ढुक्क भई । त्यसपछि कुखुराले पखेटा फटफटाएर ठूलो स्वरले कराउँदै त्यो हाँसको चल्लालाई सँधैको लागि विदा दिई र विस्तारै गोठतिर फर्की ।

सानेपा, ललितपुर
२०६० फागुन १७ गते ।

(मुसालाई दोसल्ला बालकथा संग्रहमा प्रकाशित)


माथि

शीर्षक

मूल पृष्ठमा जाउँ

   
     
संयोजक तथा संपादकः विनय कसजू
सहयोगीः गंगा कसजू
वेबसाइट संचालकः ड्रिम्स एण्ड आइडियाज
© सर्वाधिकार सुरक्षित। विस्तृत जानकारीका लागि सम्पर्कः
bhetauna@gmail.com

a presentation of